Hipertensaun Arterial (HTA), Oinsa Atu Kontrola?

on

Hipertensaun Arterial (HTA)

Definisaun

Presaun arterial (PA) katak presaun nebe ran kontra parede uat nian. Hipertensaun arterial katak presaun ka tensaun ran iha uat laran makas los ona, no konsidera hipertensaun kuandu ema adultu nia presaun arterial sistolika (PAS) no presaun arterial diastolika (PAD) liu 140/90 mmHg. Valor PAS no PAD sira nee ba adultu deit tamba labarik nia valor presaun sei varia (la hanesan) tuir tinan, sexu, a'as, nst.

Klasifikasaun

HTA bele klasifika tuir magnitude sifra tensaun nian, etiolojia, evolusaun no tipu. Maibe ema rekonhese liu maka klasifikasaun tuir magnitude sifra tensaun nian no etiolojia.

  1. Klasifikasaun tuir magnitude sifra tensaun nian
    Tuir magnitude sifras tensaun nian, AHA/ACC (American Heart Association / American College of Cardiology) rekomenda klasifikasaun foun ida ba adultu liu tinan 18, nebe mak sei fahe ba klasifikasaun sira tuir mai nee:

    Categoría de PA
    PAS

    PAD
    Normal
    <120 mm Hg
    no
    <80 mm Hg
    Elevadu
    120-129 mm Hg
    no
    <80 mm Hg
    Hipertensaun



    Estadiu 1
    130-139 mm Hg
    ka
    80-89 mm Hg
    Estadiu 2
    ≥140 mm Hg
    ka
    ≥90 mm Hg

  2. Klasifikasaun tuir etiolojia
    Tuir etiolojia sei fahe ba primaria no sekundaria
    • Primaria
      Hipertensaun arterial primaria katak pasiente sira nebe mak nia tensaun sae ho kauza nebe mak la klaru. Hipertensaun arterial primaria bele kauza husi faktor ambiental, genetiku ka fisiku. No dala barak ema sobrepeso (gendut/isin boot) sira mak kona HTA, maibe bele mos liu husi herensia, katak mai husi inan aman. 95% husi pasiente HTA mak primaria.
    • Secundaria
      Restu 5% husi pasiente HTA mak klasifika nudar sekundaria, mak sira nebe mak iha ona kauza klaru nebe mak provoka tensaun sae, mak hanesan:
      • Kauza renal
      • Kauza endokrina
      • Hipertensaun isin rua
      • Beneno (mercurio, cocaina, nst.)
      • Aimoruk (esteroides, anticonceptivo oral, nst.)
      • Estres

Faktor Predispondo

Iha faktor sira nebe mak iha relasaun boot ho hipertensaun mak hanesan tuir mai nee:
  • Tinan
    Ferik katuas sira nia uat la hanesan ona ho jovem sira nian. Sira nia uat nee toos, la flexivel, tan nee uat aumenta kiik. Tan nee ran fo presaun bot liu tan provoka tensaun sae.
  • Sexu
    National Health and Nutrition Survey (NHANES) observa katak pasiente sexu femenino mak barak liu duke sexu masculino.
  • Rasa
    Tuir evidensia sira nebe mak iha ona, rasa metan responde makas ba diuretico tiazida duke rasa mutin. Nee dehan katak ema rasa metan iha posibilidade boot liu tan hodi kona HTA, maibe sientista sira seidauk bele identifika nia razaun.
  • Bokur
    Hormona lepsina nebe mak sekreta husi selula grasa (lemak) provoka kakutak hodi hasae tensaun.
  • Dieta nebe mak mer
    Masin nee substansia ida nebe mak importante los iha ita nia isin loron. Maibe kuandu masin barak liu ona, mosu desequilibrio entre nutriente sira. Entaun ita nia isin hodi halo equilibrio fali, halo ita sente hamrook hemu be, aumenta presaun osmotika, no aumenta tensaun arterial.

Sintoma

Babain HTA "LA IHA SINTOMA". Tan nee maka HTA nee moras nebe perigu los. Maibe dala ruma bele iha sintoma sira tuir mai nee:
  • Ulun moras
  • Oin halai
  • Hirus matan moras
  • Susar atu dada iis
  • Oin mean
  • Mudansa iha haree no rona
  • nst.

Diagnostiku

Ita bele halo auto-diagnostiku, katak halo diagnostiku rasik, ba moras HTA liu husi sukat tensaun arterial. Ohin loron pasiente HTA barak los ona nomos hodi fasilita doutor sira nia servisu iha ona Mesin elektronik nebe ajuda sukat tensaun arterial fasil los, hein hatama liman deit. Maibe ba profesional sira no mos se karik iha problema ekonomiku, bele sukat manual ho esfigmomanometro no estetoscopio.

Metodu atu sukat tensaun arterial bele nonton ami nia video:

03. Oinsa atu koko tensaun ho esfigmomanometro


Tratamentu

Tratamentu ba HTA iha rua, ida uza aimoruk, no ida seluk nebe la uza aimoruk. Tratamentu uza aimoruk mak diak liu, bele kontrola tensaun sistematikamente. Tan nee karik ita nia tensaun sae, ba klinika no hospital nebe mak iha besik, simu diagnostiku no medikamentu husi Doutor.

Maibe ami la haluha mos fo introduz ba tratamentu nebe la uza aimoruk, tamba sira nee ekonomiku. No ho metodu sira nee "bele prevene" HTA ba pasiente sira normal sira. Metodu sira nee mak hnesan tuir mai nee:
  • HATUN ISIN (ba sira nebe mak isin boot)
  • Han tuir dieta nebe mak saudavel
  • Hamenus masin
  • Olahraga
  • La bele hemu barak alkohol / tua
  • Koko atu labele estres
  • nst.

Konklusaun

Hipertensaun Arterial nee moras nebe mak ran fo presaun makas kontra uat. Moras ida nee dala barak sintoma la iha tan nee pasiente barak mak moris la hatene katak nia tensaun sae. Maibe HTA bele provoka moras fuan no uat nebe mak perigu los. Tan nee maske ita sente saudavel mos tenki check tensaun periodikamente no koko hodi prevene Hipertensaun arterial.

Bilbiografia

  1. Ministerio de Salud Pública de Cuba, “Guía cubana de diagnóstico, evaluación y tratamiento de la hipertensión l”, La Habana: Comisión Nacional Técnica Asesora del Programa de Hipertensión Arterial, 2017.
  2. Paul K. Whelton, “Guideline for Prevention, Detection, Evaluation, and Management of High Blood Pressure in Adults”, Journal of the American College of Cardiology, Vol.71, No.19, pp.127-248, 2018.
  3. Reinaldo Roca Goderich, “Temas de Medicina Interna”, La Habana, Cuba: Editorial Ciencias Médicas, 2002.
  4. Alex Figueroba. “Hipertensión arterial: qué es, síntomas, causas y tipos”, 8 de Noviembre de 2017; https://viviendolasalud.com/enfermedades/hipertension-arterial
  5. XY3999, “Historia de la hipertensión”, 1 de Abril de 2019; https://es.m.wikipedia.org/wiki/Historia_de_la_hipertensión.
  6. Juan K. Urrea, “Hipertensión arterial en la mujer”, Revista Colombiana de Cardiología, Vol.25, Suplementario.1, pp. 13-20, 2018.
  7. Ixchel Flores Monge, “Hipertensión en Personas de Raza Negra”, Revista Médica Sinergia, ISSN 2215-4523, Vol.1, No.3, pp.14-17, Marzo 2016.
  8. El Médico Interactivo. “Hallada de relación entre obesidad e hipertensión arterial”, 5 de Diciembre de 2014; http://elmedicointeractivo.com/hallada-relacion-obesidad-hipertension-arterial-20141205132218051296/
  9. Alex Figueroba. “Hipertensión arterial: qué es, síntomas, causas y tipos”, 8 de Noviembre de 2017; https://viviendolasalud.com/enfermedades/hipertension-arterial